Өрт қауіпсіздігі ережелері туралы тәрбие сағаты

Posted on by

Тақырыбы: «Өрт – тілсіз жау»

Мақсаты: өрттің шығу себептерімен таныстыру; экстремалды жағдайда өзін дұрыс ұстауды және жылдам әрекет етуді үйрету.

Әдісі: әңгімелесу, мысал келтіру, ойындар.

Көрнекі құралдар: плакаттар, шелек, жіп.

Сабақтың барысы

I. Ұйымдастыру кезеңі

– От – жарық пен жылудың көзі. Ол ежелгі адамдарға жабайы жануарлардан қорғануға, тамақ дайындауға және құрал-саймандар жасауға көмегін тигізген. Қазіргі таңда, адамзат отты қолдану арқылы көптеген технологиялық жетістіктерге жетуде. Алайда, қауіпсіздік ережелері бұзылған кезде, ол тілсіз жауға айналып, үлкен апатттарды тудырады.

II. Негізгі бөлім

– Өрт шыққан кезде не істеу керек екендігін кім біледі? Әр түрлі жағдайларды қарастырайық.

1-жағдай:

Сіз теледидар көріп жатқан кезде, оның артқы жағы түтіндеп, өртене бастағаның байқадыңыз. Осындай жағдайда не істеу керек? (балалар жауап бере бастайды).

  • Теледидарды тоқтан ажыратамын;
  • Үстіне дымқыл шүберек жабамын;
  • Есікті жауып, бөлмеден дереу шығамын;
  • «101» нөміріне қоңырау шаламын.

2-жағдай:

Табада май өртеніп жатыр. Не істейсіз:

  • Газды өшірімен;
  • Табаға ылғал сүлгіні лақтырамын.

3-жағдай

Ғимараттан киімі өртеніп жатқан адам жүгіріп шықты. Сіздің іс-әрекетіңіз қандай болады?

  • Адамның үстіне мата жабамын;
  • Жерге құлатып, домалатамын.

Өрт кезіндегі іс-әрекет тәртібі

  1. «101» нөмірі арқылы өрт сөндірушілерге қоңырау шалып, не жанып жатқаның, нақты мекен-жайыңызды, аты-жөніңізді және телефон нөміріңізді хабарлаңыз;
  2. үрейге берілмей, сабыр сақтаңыз;
  3. лифтіні қолданбай, тек баспалдақпен түсіңіз;
  4. өртті өшіруге шамаңыз жетпесе, ол жерден тезірек кетіңіз;
  5. түтінді бөлмеде жорғалап жүруге тырысыңыз, себебі, төменгі жақта ауа көбірек;
  6. аузыңыз бен мұрныңызды дымқыл сүлгімен жауып қойыңыз, бұл өкпеге кіретін тұншықтырғыш газдың мөлшерін азайтады;
  7. терезелерді сындырмаңыз, өйткені өрт оттегімен қоректенеді. Кенеттен есікті немесе терезені ашып қалсаңыз, оттың жануы күшейе түседі.

Өрттің шығу себептері

  1. отты абайсыз қолдану (сіріңкемен ойнау);
  2. далаға жағылған отты сөндірмей кету;
  3. электр жылытқыш құрылғыларын қараусыз қалдыру;
  4. тұрмыстық газдың шығып кетуі;
  5. электр сымдарының қысқаша тұйықталуы;
  6. өшірілмеген шам;
  7. найзағай соққысы;
  8. пиротехниканы абайсыз қолдану.

Ойындар

«Өртті сөндір» ойыны

Оқушылар 2 топқа бөлініп, еденге 2 шелекті қояды. Алғашқы қатысушылар ыдыстарына су құйып, шелектерге төгеді. Содан соң, өз командаларына жүгіріп барып, ыдысты келесі ойыншыларға береді. Шелекті бірінші болып толтырған команда жеңіске жетеді.

«Екі етік – бір жұп» ойыны

Бірінші ойыншының сол аяғы, екінші ойыншының оң аяғына жіппен байланған. Олар қол ұстасып, мәреге жету керек. Өрт кезінде жылдам және бірлесіп жұмыс істей білу өте маңызды.

Өртті сөндіруден гөрі, оны болдырмау оңай. Сондықтан, сіздерді осы сабақта айтылған кеңестерді күнделікті өмірде қолдануға шақырамын. Ең жақсы қорғаныс – қауіпсіздік ережелерін білу және қатаң сақтау.