Александрия шамшырағы туралы мәлімет

Александрия шамшырағы — біздің дәуірімізге дейін 3 ғасырда салынған ежелгі құрылым.

Бұл қала — Мысырдың жаңа астанасы ретінде б.з.д. 332-331 жылдары Александр Македонскийдің бұйрығымен құрылып, ірі мәдени және ғылыми орталыққа айналды. Жағалау суларында кемелердің қауіпсіз қозғалысын қамтамасыз ету мақсатында, Фарос аралында шамшырақ салу көзделді.

Құрылыс жұмыстарын сәулетші Сострат Книдский басқарды. Мұнара үш қабаттан тұрды, оның қабырғалары мәрмәр тақталардан қаланды. Табаны үлкен тас блоктардан тұрды. Ал, бұрыштары тритон мүсіндерімен безендірілген. Маяктың төбесінде үнемі жанып тұратын жалын болды. Отын арнайы пандус арқылы жеткізіліп отырған. Ең жоғарғы бөлігіне теңіз құдайы Посейдонның мүсіні орнатылды.

Шамшырақтың жалпы биіктігі 120 метрден асты. Оның жарығы 50 шақырым қашықтықтан көрініп, кемелердің теңіз рифтеріне соғылмауына және тұманды ауа райында адаспауына көмектескен. Оттың жарқырағаны соншалық, түңгілік уақытта оны аспандағы жұлдызға ұқсатуға болатын.

Құрылыс б.з.д. 283 жылы аяқталып, 12 жылға созылды. Оған қазынадан шамамен 23 тонна күміс жұмсалды. Құрылым тек маяк ғана емес, сонымен қатар теңіз жолын күзететін мықты бекініс болды. Арабтар Египетті 700 жылдан кейін жаулап алғанда, Александрия шамшырағы әлі де өз қызметін атқарып тұрған. Өкінішке қарай, мұнара бүгінгі күнге дейін сақталмады. Ол XIV ғасырда жер сілкінісінен кейін толығымен қирап, сынықтары арабтардың Қайтбай бекінісін салуға пайдаланылды.

Ұқсас: Родос алыбы туралы мәлімет